Your description goes here

კავკასიის უნივერსიტეტის მისიაა კვლევებზე ორიენტირებული სწავლების და სწავლის დანერგვით ადგილობრივ და საერთაშორისო შრომის ბაზრებზე კონკურენტუნარიანი, მაღალკვალიფიციური, ზნეობრივად სრულყოფილი, დემოკრატიის იდეალების ერთგული სპეციალისტების მომზადება და საზოგადოების საგანმანათლებლო-საკონსულტაციო მოთხოვნების დაკმაყოფილება. მუდმივი თვითშეფასებისა და განვითარების კვალობაზე კავკასიის უნივერსიტეტი საჭიროებისამებრ ახდენს მისი მისიის გადახედვას, რათა უზრუნველყოს კავკასიის უნივერსიტეტის შესაბამისობა მუდმივად ცვალებად გარემოსა და მზარდ მოთხოვნებთან. კავკასიის უნივერსიტეტი (შემდგომში "უნივერსიტეტი”) შეზღუდული პასუხისმგებლობის საზოგადოების სახით ჩამოყალიბებული კერძო სამართლის იურიდიული პირია, რომელიც საქმიანობას ახორციელებს საქართველოს მოქმედი კანონმდებლობის, მისი წესდების და ამ შინაგანაწესის საფუძველზე. უნივერსიტეტს აქვს დამოუკიდებელი ბალანსი, მრგვალი ბეჭედი, საკუთარი დროშა, ჰიმნი და სხვა სიმბოლოები, ანგარიშსწორების ანგარიში ბანკში და კერძო იურიდიული პირის სხვა რეკვიზიტები. უნივერსიტეტის დევიზია: "Studium Pretium Libertatis"- ”ცოდნა თავისუფლების საწინდარია”. უნივერსიტეტს აქვს უფლება საქართველოს კანონმდებლობით დადგენილი წესით კურსდამთავრებულებს მიანიჭოს დიპლომირებული სპეციალისტის კვალიფიკაცია, ბაკალავრის, მაგისტრის და დოქტორის აკადემიური ხარისხები.

კავკასიის უნივერსიტეტის ძირითადი მიზნებია:

• სტუდენტის ინტერესებისა და შესაძლებლობების შესატყვისი, შესაბამისი საფეხურის უმაღლესი განათლების მიღების, მსმენელის კვალიფიკაციის ამაღლებისა და გადამზადების მოთხოვნილებათა დაკმაყოფილება და სტუდენტის პიროვნული პოტენციალის რეალიზება, შემოქმედებითი უნარ-ჩევების განვითარება მაღალი ხარისხის უმაღლესი აკადემიური და პროფესიული საგანმანათლებლო პროგრამების განხორციელების გზით;
• მეცნიერების განვითარება;
• სტუდენტებში ქართული და მსოფლიო კულტურის ფასეულობების სისტემის ჩამოყალიბების ხელშეწყობა, მათი ორიენტირება სამოქალაქო საზოგადოების არსებობისა და განვითარებისათვის აუცილებელი დემოკრატიისა და ჰუმანიზმის იდეალებზე;
• უმაღლესი კვალიფიკაციის მქონე ადგილობრივი და უცხოელი აკადემიური პერსონალის მოზიდვა და შენარჩუნება;
• სწავლა/სწავლების და სამეცნიერო კვლევებისათვის უახლესი მეთოდები; ტექნიკური საშუალებებით აღჭურვილი გარემოს შექმნა, მეთოდური და ინფორმაციული უზრუნველყოფა.

ჩამოყალიბებული მიზნების მისაღწევად უნივერსიტეტი:

• შეიმუშავებს სტრატეგიული განვითარების და კალენდარულ გეგმებს;
• ახორციელებს აკადემიური უმაღლესი განათლების საბაკალავრო, სამაგისტრო და სადოქტორო საგანმანათლებლო პროგრამებს;
• ახორციელებს პროფესიული უმაღლესი განათლების საგანმანათლებლო პროგრამებს;
• ახორციელებს პროფესიული მომზადებისა და გადამზადების მოკლევადიან საგანმანათლებლო პროგრამებს/კურსებს;
• ახორციელებს უწყვეტი განათლების პრინციპს;
• ღია კონკურსის საფუძველზე ახდენს მაღალი სამეცნიერო და პედაგოგიური პოტენციალის მქონე აკადემიური პერსონალის შერჩევას;
• ახორციელებს სამეცნიერო კვლევებს; ხარისხის უზრუნველყოფის ეფექტური მეთოდების გამოყენებით აღწევს სწავლებისა და კვლევის მაღალ დონეს;
• ახდენს სამეცნიერო მუშაობის ხელშეწყობას, მათ შორის თავისი ბიუჯეტიდან გამოყოფილი სახსრების მეშვეობით;
• ახორციელებს საგანმანათლებლო საქმიანობას, აქვეყნებს სახელმძღვანელოებს, სხვა სასწავლო ლიტერატურას და სამეცნიერო კვლევების შედეგებს;
• უზრუნველყოფს სწავლის, სწავლებისა და სამეცნიერო კვლევის აკადემიურ თავისუფლებას;
• უზრუნველყოფს აკადემიური პერსონალისა და სტუდენტთა მონაწილეობას გადაწყვეტილებების მიღებისა და მათი შესრულების კონტროლის პროცესში უზრუნველყოფს მართვის საჯაროობასა და გამჭვირვალობას;
• ზრუნავს შეზღუდული შესაძლებლობების მქონე სტუდენტთათვის სწავლის პირობების შესაქმნელად. თანამშრომლობს საქართველოს და უცხოეთის უმაღლეს საგანმანათლებლო დაწესებულებებთან; ახორციელებს დამხმარე ეკონომიკურ საქმიანობას;
• კანონმდებლობის ფარგლებში უზრუნველყოფს სხვა ისეთი პირობების შექმნას, რომლებიც ხელს უწყობს უნივერსიტეტის მიზნების განხორციელებას;